Border News Agency
မင်းပြား၊ ဩဂုတ် ၁၇။
အာရက္ခဒေသမှာ ရေကြီးမှုကြောင့် စိုက်ပျိုးထားပြီးသား စပါးခင်းဧကနှစ်သောင်းခန့်ပျက်စီးသွားခဲ့ပြီး လယ်အများစုကို စပါးတွေ ပြန်မစိုက်ပျိုးနိုင်ကြဘူးလို့ လယ်သမားတွေနဲ့လယ်သမား အရေးကူညီဆောင်ရွက်နေသူတွေက ဆိုကြပါတယ်။
အဲဒီလယ်တွေကို စပါးပြန်လည်စိုက် ပျိုးဖို့အရင်းအနှီး၊မျိုးစပါးမရှိတာ၊ အ ချိန်မမီတော့တာမို့ ထပ်မစိုက်နိုင်ကြ တာလို့ လယ်သမားတွေက ဆိုကြပါတယ်။
“ကောက်မျိုးစပါးလည်း ရှာမရပါဘူး။ ရေနဲ့ပါသွားတာတွေ ရှိပါတယ်။ ကောက်မျိုးရရင်တောင် ထပ်ထွန်ဖို့၊ထပ်လုပ်ဖို့က ပိုက်ဆံမရှိပါဘူး။ လယ်လုပ်လို့ အရှုံးပေါ်ရတဲ့အထဲ ဒီလိုဖြစ်တော့ ပိုဆိုးသွားပါတယ်။” လို့ မင်းပြားမြို့နယ်မှ လယ်သမားတဦးက Border News Agency ကို ပြောပါတယ်။
တောင်ကုတ်၊ကျောက်တော်၊ပုဏ္ဏားကျွန်း၊ မြောက်ဦး၊ မင်းပြား၊ဘူးသီးတောင်၊ မောင်တော၊ရသေ့တောင် စတဲ့မြို့နယ်တွေမှာ ဇွန်လဆန်းမှဇူလိုင်လထိ မိုးအဆက်မပြတ်ရွာသွန်းမှုကြောင့် မြစ်ရေ၊ ချောင်းရေတွေမြင့်တက်ပြီးရေကြီးခဲ့တာပါ။
အဲဒီရေကြီးမှုကြောင့် ကျောက်တော်၊ မြောက်ဦး၊မင်းပြားစတဲ့မြို့နယ်တွေမှာ စပါးခင်းပျက်စီးမှုအများဆုံးရှိခဲ့တယ်လို့ လယ်သမားအရေးဆောင်ရွက်နေသူတွေက ဆိုကြပါတယ်။
“တဧကကွက်တကွက်မှာ ရေနစ်ရင် တစိတ်တခြမ်းပျက်သွားပါမယ်။တချို့နေ ရာတွေမှာတော့ အပင်ကြီးထွားမှုတွေ ရပ်ဆိုင်းသွားတာတွေ ရှိနိုင်ပါတယ်။ လုံး၀ပျက်(သေ)ထွက်သွားတာတွေလ ည်းရှိနိုင်ပါတယ်။နေရာတွေကတော့ မြောက်ဦးမြို့နယ်မှာဆိုရင် ပေါင်းတုတ်ကွင်းပါ။ ကျောက်တော်ဘက်မှာဆိုရင် ညောင်ချောင်း၊ စပါးဆိပ်နားက ကွင်းတွေရှိပါမယ်။ထိခိုက်တာကတော့ များ ပြားပါမယ်။” လို့ ဓည၀တီတောင်သူ လယ်သမားဖွံ့ ဖြိုးတိုးတက်ရေးအသင်းမှ အထွေထွေအတွင်းရေးမှူးဦးမောင်သိန်းလှက Border News Agency ကို ပြောပါတယ်။
အဲဒီစပါးခင်းတွေကို ထပ်စိုက်မယ်ဆိုရင် ထပ်စိုက်လို့ရနိုင်ပေမယ့် ရာသီဥတိုကိုစိတ်မချရတာမို့ ထပ်မစိုက်ကြတော့တာလို့ လယ်သမားတွေက ဆိုကြပါတယ်။
“အရင်းအနှီးရှိလို့ ထပ်စိုက်ရင်တောင် မိုးကမမှန်ရင် စပါးက မဖြစ်ပါဘူး။ပျ က်မှာပါ။အဖူးဖူးရမယ့်အချိန် အားတင်ဖို့ ဓါတ်မြေဩဇာကျွေးနိုင်ရပါမယ်။ နောက် မိုးလိုပါတယ်။မိုးမရွာရင် သွားပါပြီ။အဲဒါကြောင့် စပါးထပ်မစိုက်ကြတာပါ။” လို့ မင်းပြားမြို့နယ်မှ လယ် သမားတဦးက Border News Agency ကို ပြောပါတယ်။
အာရက္ခလယ်သမားတွေဟာ လယ်ယာလုပ်ငန်းသုံးသွင်းအားစုတွေအဆမတန်စျေးကြီးတာ၊လယ်ယာထွက်ကုန်စပါးတွေ စျေးကောင်းမရတာ၊ရောင်းမထွ က်ကြတာမို့ လယ်သမားတွေဟာလယ် ယာမြေအားလုံးကို ထွန်ယက်မစိုက်ပျိုးနိုင်ကြဘဲ အနည်းငယ်ကိုသာ ထွန်ယက်စိုက်ပျိုးခဲ့ကြတယ်လို့ ဆိုကြပါတယ်။
အာရက္ခဒေသမှာ စပါးစိုက်ဧကတဆယ့်နှစ်သိန်းကျော်ရှိပေမယ့် စပါးစိုက်ဧ ကထက်ဝက်ခန့်တောင် မစိုက်ပျိုးနိုင်ကြဘူးလို့ လယ်သမားအရေးဆောင် ရွက်သူတွေခန့်မှန်းထားကြပါတယ်။
အဲဒီလိုအခြေအနေမှာရေကြီးမှုကြောင့် စိုက်ပျိုးထားပြီးသား စပါးခင်းဧကနှစ်သောင်းခန့်ပျက်စီးခဲ့ရတာပါ။
အာရက္ခဒေသမှာ စပါးစိုက်ပျိုးသူတဖြေးဖြေးနည်းပါးလာသလို ပြည်တွင်းရိက္ခာဖူလုံမှုကို ထိခိုက်နိုင်တာမို့ အာရက္ခပြည်သူ့တော်လှန်ရေးအစိုးရဟာ စပါးစိုက်တောင်သူတွေအတွက် သွင်းအားစုတွေ စျေးသက်သက်သာသာနဲ့ရနိုင်ရေး၊ စပါးတွေစျေးကောင်းရရေး ကူညီဆောင်ရွက်ကြိုးပမ်းပေးဖို့လိုအပ်တယ်လို့ လယ်သမားတွေက ထောက်ပြတောင်းဆိုနေကြပါတယ်။
အာရက္ခပြည်သူ့တော်လှန်ရေးအစိုးရက တော့ လယ်သမားတွေကိုမျိုးစပါးတွေ၊ဓါတ်မြေဩဇာတချို့ ထောက်ပံ့ကူညီရောင်းချပေးပေမယ့် လယ်သမားတွေအတွက် သက်သာတဲ့နှုန်းထားမဟုတ်ဘူးလို့ တောင်သူလယ်သမားတွေက ထောက်ပြကြပါတယ်။
အာရက္ခအဆုံးအဖြတ်စစ်ပွဲစတင်ကတ ည်းက စစ်ကော်မရှင်တပ်က လမ်းပန်းဆက်သွယ်ရေးအပါအဝင် ကုန်စည်စီးရင်းမှုတွေကိုလည်း ပိတ်ဆို့ထားတာမို့လယ်သမားတွေဟာ မျိုးစပါးတွေအပါအဝင် ဓာတ်မြေသြဇာတွေ၊ သွင်းအားစုတွေ၊ စက်သုံးဆီတွေကို အိမ်နီးချင်းနိုင် ငံတွေကသာ ခက်ခက်ခဲခဲဝယ်ယူတင်သွင်းနေကြရတယ်လို့ တောင်သူလယ် သမားတွေက ဆိုကြပါတယ်။
