(ဂွမြို့နယ်တွင် စစ်ကျန်လက်နက်ကြောင့် ထိခိုက်သူဒါဇင်နဲ့ချီရှိလာ)
ဂွမြို့နယ်မှာ ဖေဖော်ဝါရီလ ၃ ရက်နေ့က စစ်ကောင်စီတပ်ရဲ့ စစ်ကျန်လက်နက်ဗုံးကို ဆော့ကစားရာမှာပေါက်ကွဲပြီး အသက် ငါးနှစ်အရွယ်ကလေးငယ်တစ်ဦးအပါအဝင် သုံးဦးသေဆုံးပြီး နှစ်ဦးဒဏ်ရာရသွားခဲ့တယ်လို့ ဒေသခံတွေက ဆိုကြပါတယ်။
အဲဒီ ဂွမြို့နယ်၊ တိုင်ကျိုးကျေးရွာမှ အသက် ၅ နှစ်အရွယ်ကလေးငယ် တစ်ဦး၊အသက်၂၀အရွယ် အမျိုးသမီးတစ်ဦးနဲ့ အသက် ၄၀ အရွယ်အမျိုးသား တစ်ဦး တို့သေဆုံးသွားခဲ့ပြီး နှစ်ဦးထိခိုက်ဒဏ်ရာရသွားခဲ့ပါတယ်။
အဲဒီ သေဆုံးသွားသူတွေကို ဂွမြို့နယ်စစ်ဘေးရှောင်ကူညီရေးပူးပေါင်းအဖွဲ့ကို သဂြိုလ်ပေးခဲ့ပြီး ဒဏ်ရာရသူတွေကိုတော့ဆေးကုသမှုတွေ ပြုလုပ်နေတယ်လို့ဆိုပါတယ်။
ဂွ မြို့နယ်မှာ စစ်ကောင်စီတပ်က သူတို့ တပ်စွဲခဲ့တဲ့နေရာတွေမှာ စွန့်ပစ်မိုင်းတွေ ချန်ထားခဲ့ပြီး ယင်း မိုင်းတွေ ဗုံးသီးတွေကြောင့် ထိခိုက်သေဆုံးသူတွေ ခပ်စိတ်စိတ်ရှိလာနေတယ်လို့ ဒေသခံတွေဆီကသိရပါတယ်။
ပြီးခဲ့တဲ့ ဇန်နဝါရီ ၁၈ ရက်ကလည်း ဂွမြို့နယ် ကင်းပုံရွာက အသက် ၄ နှစ်အရွယ်ကလေးတစ်ဦးဟာ ဖခင်ယူလာတဲ့ စစ်ကျန်ဗုံးသီးကို ထုခွဲကစားစဥ် ပေါက်ကွဲပြီး သေဆုံးခဲ့ပါတယ်။
ပြီးခဲ့တဲ့နှစ် ဒီဇင်ဘာလ ၁၈ ရက်နေ့က ဂွမြို့နယ် ဂျိုင်ကောက်ရွာသားအသက် ၄၇ နှစ်အရွယ် အမျိုးသားတစ်ဦး နွားကျောင်းနေစဉ် မှာ မိုင်းနင်းမိလို့ ခြေတစ်ဖက်ဆုံးရှုံးခဲ့သလို ဒီဇင်ဘာလ ၁၇ ရက်နေ့ကလည်း ကုလားပြင်ရွာသူ အသက် ၃၀ အရွယ် အမျိုးသမီးတစ်ဦးဟာ စပါးရိတ်သိမ်းဖို့ လယ်ကွင်းထဲ ဆင်းစဉ် မိုင်းနင်မိလို့ ခြေထောက်တစ်ဖက် ဆုံးရှုံးခဲ့ရပါတယ်။
ဂွမြို့နယ်စစ်ပွဲကာလအတွင်း စစ်ကျန်မိုင်းကြောင့် ထိခိုက် သေဆုံးသူ (၅)ဦး၊ ဒဏ်ရာရှိသူ(၇)ဦးစုစုပေါင်း(၁၂)ဦးထိ ရှိလာပြီဖြစ်တယ်လို့ဂွမြို့နယ်စစ်ဘေးရှောင် ကူညီရေးပူးပေါင်းအဖွဲ့က သိရပါတယ်။
ဒါ့အပြင်မောင်တောမြို့နယ်မှာ ဇန်နဝါရီလ ၂၉ ရက်နေ့ကစစ်ကောင်စီထောင်ထားခဲ့တဲ့မိုင်းနင်းမိလို့ အသက်မပြည့်သေးတဲ့ကလေးတဦးဒဏ်ရာပြင်းပြင်းထန်ထန်ရသွားခံပါတယ်။
အာရက္ခအဆုံးအဖြတ်စစ်ပွဲမှာစစ်ကောင်စီတပ်က လက်နက်ကြီးတွေ၊အတွဲလိုက်ဒုံးတွေ၊နေဗီတွေ၊တိုက်လေယာဥ်တွေ၊ဒရုန်းတွေ၊မြေမြုပ်မိုင်းတွေ၊စစ်ကျန်လက်နက်တွေနဲ့အာရက္ခပြည်သူတွေကို အကြောင်းမဲ့ပစ်ခတ်သတ်ဖြတ်တာတွေနေ့စဥ်ရက်ဆက်ပြု လုပ်နေတယ်လို့ အာရက္ခပြည်သူတွေကဆိုကြပါတယ်။
အာရက္ခပြည်သူ့တော်လှန်ရေးအစိုးရအနေနဲ့ မိုင်းအသိပညာပေးမှုတွေကို မကြာခဏပြုလုပ်နေသလို မြေမြင်တွေမှာလည်း မြေမြုပ်မိုင်းအန္တရာယ်အတွ က် ဟောပြောပွဲတွေကိုပြည်သူလူထုတွေကြားမှာလုပ်ဆောင်နေပြီး မိုင်အသိပညာပေးလက်ကမ်းစာစောင်တွေကိုဖြန့်ဝေတာတွေ၊မိုင်းအန္တရာယ်ဆိုင်ရာသတိပေးတာတွေကို ပုံမှန်လုပ်ဆောင်နေတယ်လို့ဆိုပါတယ်။
ဒါပေမယ့် အာရက္ခပြည်သူတွေဟာ စစ်ကောင်စီတပ်ရဲ့မိုင်းတွေ၊စစ်ကျန်လက် နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊မိုင်းအသိပညာပေးတာတွေကိုပိုမိုဆောင်ရွက်ပေးဖို့လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
