အာရက္ခတပ်တော်ထိန်းချုပ်ထားတဲ့ ကျောက်တော်မြို့နယ်မှာ မတ်လ ၁၉ ရက်၊ မနေ့က စစ်ကျန်ဗုံးသီးပေါက်ကွဲလို့ ကလေးတဦးသေဆုံးပြီး လေးဦးဒဏ်ရာရသွားတယ်လို့ ဒေသခံတွေကဆိုကြပါတယ်။
အဲဒီကျောက်တော်မြို့နယ်၊ မင်းသားတောင်ကျေးရွာက အသက်ဆယ့်ခြောက်နှစ်အရွယ်မောင်ဌေးဦးသေဆုံးသွားပြီး အသက်ဆယ့်ခြောက်နှစ်အရွယ်မောင်ကျော်ဆန်းလင်း၊ အသက်ဆယ့်ငါးနှစ်အရွယ်မောင်ခိုင်အောင်မျိုး၊ အသက်ဆယ့်လေးနှစ်အရွယ်မောင်နေပိုင်စိုး၊ အသက်ဆယ့်သုံးနှစ်အရွယ်မောင်မောင်သန်းနိုင်တို့ ဒဏ်ရာပြင်းပြင်းထန်ထန်ရသွားခဲ့ကြတယ်လို့ ဒေသခံတွေကဆိုကြပါတယ်။
အဲဒီသေဆုံးသွားခဲ့တဲ့ မောင်ဌေးဦးတို့ သူငယ်ချင်းတွေဟာ မတ်လ ၁၉ ရက်၊ ညနေ ၃ နာရီ ၄၅ မိနစ်အချိန်ခန့်က ရွာအနီးသရီချောင်းထဲကကောက်ယူလာတဲ့ စစ်ကျန်ဗုံးသီးတလုံးကိုကစားရာမှာပေါက်ကွဲမှုဖြစ်ပြီး ခုလိုသေဆုံး၊ဒဏ်ရာရသွားကြတာလို့ ရွာသားတွေကဆိုကြပါတယ်။
အဲဒီဒဏ်ရာရသူတွေဟာ ဒဏ်ရာပြင်းထန်တာကြောင့် အရေးပေါ်ဆေးကုသမှုခံယူနေရတယ်လို့ ရွာသားတွေကဆိုကြပါတယ်။
အာရက္ခတပ်တော်ထိန်းချုပ်ထားတဲ့ ပေါက်တောမြို့နယ်မှာလည်း ဖေဖော်ဝါရီလ ၁၂ ရက်နေ့က စစ်ကောင်စီတပ်ရဲ့စစ်ကျန်ဗုံးပေါက်ကွဲလို့ ပြည်သူနှစ်ဦးသေဆုံးပြီး လေးဦးဒဏ်ရာရသွားခဲ့ပါတယ်။
အဲဒီပေါက်တောမြို့နယ်၊ ဂြင်းဒွေကျေးရွာက အသက်နှစ်ဆယ်အရွယ်ကိုနေမျိုးဝင်း၊ အသက်တဆယ့်ရှစ်နှစ်အရွယ်ကိုကိုနိုင်သေဆုံးသွားခဲ့သလိုအသက်တဆယ့်ငါးနှစ်အရွယ်ငြိမ်းစိုးလင်း၊ အသက်တဆယ့်ငါးနှစ်အရွယ်ဟိန်းစိုးနိုင်၊ အသက်တတယ့်ခုနှစ်နှစ်အရွယ်မင်းစိုးထွန်း၊အသက်နှစ်ဆယ်အရွယ်မြတ်အေးခိုင်မှာဒဏ်ရာရသွားခဲ့ကြတာပါ။
သူတို့တွေဟာဖေဖော်ဝါရီလ ၁၂ ရက်နေ့က စွန်ရဲကျေးရွာကနေကောက်ယူလာတဲ့ စစ်ကောင်စီတပ်ရဲ့စစ်ကျန်ဗုံးသီးတလုံးကိုဂြင်းဒွေကျေးရွာရှိကန်နှစ်ကန်ကြားက ကုက္ကိုလ်ပင်အောက်မှာထု ကြည့်ခဲ့တာကြောင့်ခုလိုသေဆုံး၊ ဒဏ်ရာရခဲ့ကြတာဖြစ်ပါတယ်။
အာရက္ခအဆုံးအဖြတ်စစ်ပွဲမှာစစ်ကောင်စီတပ်က လက်နက်ကြီးတွေ၊ အတွဲလိုက်ဒုံးတွေ၊ နေဗီတွေ၊ တိုက်လေယာဥ်တွေ၊ ဒရုန်းတွေ၊ မြေမြုပ်မိုင်းတွေ၊ စစ်ကျန်လက်နက်တွေနဲ့အာရက္ခပြည်သူတွေကို အကြောင်းမဲ့ပစ်ခတ်သတ်ဖြတ်တာတွေနေ့စဥ်ရက်ဆက်ပြုလုပ်နေတယ်လို့ အာရက္ခပြည်သူတွေကဆိုကြပါတယ်။
အာရက္ခပြည်သူ့တော်လှန်ရေးအစိုးရအနေနဲ့ မိုင်းအသိပညာပေးမှုတွေကို မကြာခဏပြုလုပ်နေသလို မြေမြင်တွေမှာလည်း မြေမြုပ်မိုင်းအန္တရာယ်အတွက်ဟောပြောပွဲတွေကိုပြည်သူယလူထုတွေကြားမှာလုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာသတိပေးတာတွေကို ပုံမှန်လုပ်ဆောင်နေတယ်လို့ဆိုပါတယ်။
ဒါပေမယ့် အာရက္ခပြည်သူတွေဟာ စစ်ကောင်စီတပ်ရဲ့မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊မိုင်အသိပညာပေးတာတွေကိုပိုမိုဆောင်ရွက်ပေးဖို့လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
